पदकांसाठी झुंज

लोव्हलिना बोर्गोहेन 

ऑलिंपिकचा महोत्सव समारोपाच्या दिशेने वाटचाल करीत असताना बुधवारी (दि. ४) आपल्या खात्यात तिसऱ्या पदकाची भर पडली. तेही महिला खेळाडूनंच मिळवून दिलं. मुष्टियुद्धाच्या वेल्टरवेट गटातील उपान्त्य फेरीत लोव्हलिना बोर्गोहेन हिला तुर्कस्तानच्या बुसेनाझ सुरमेनेली हिनं ५-० असं हरवलं; पण इथपर्यंत पोहोचतानाच तिनं पदक निश्चित केलं होतं. आसामच्या गोलघाट जिल्ह्यातली ही अवघ्या तेवीस वर्षांची खेळाडू पहिल्यांदाच ऑलिंपिकसाठी निवडली गेली. पदार्पणातच तिनं कांस्यपदक जिंकलं. हॉकीमध्ये पुरुषांप्रमाणंच महिलांची उपान्त्य झुंज अपयशी ठरली आणि त्यांनाही आता कांस्यपदकासाठी खेळावं लागेल.

रविकुमार दहिया...अंतिम फेरीत, पदक  निश्चित

महिला देशासाठी पदक मिळवत असताना कुस्तीगीर रविकुमार दहिया ह्यानं अंतिम फेरी गाठून पदक निश्चित केलं. फ्रीस्टाईलच्या ५७ किलो गटात रविकुमार ह्याने आज सलग तीन विजय मिळविले. आधी त्याने कोलंबियाच्या अर्बानो ऑस्कर एदुआर्दो  ह्याचा ४-१ असा तांत्रिक गुणांवर पराभव केला. पुढच्या फेरीत त्यानं बल्गेरियाच्या जॉर्जी व्हॅलेंतिनो वँगेलॉव्ह ह्याला १४-४ अशी मात दिली. उपान्त्य फेरीतही त्यानं जोरदार खेळ केला. कझाकस्तानच्या नुरइस्लाम सानायेव्ह ह्याला हरवून त्यानं अंतिम फेरी गाठली. त्याची गाठ पडेल रशियाच्या उगुएव्ह झावूर ह्याच्याशी.

फ्रीस्टाईलमध्येच एका कांस्यपदकाची अपेक्षा आहे. दीपक पुनिया ह्यानं ८६ किलो गटात दोन लढतींमध्ये बाजी मारली. त्यानं आधी नायजेरियाच्या एकेरेकेम अजिओमोर १२-१ असा एकतर्फी विजय मिळविला. पुढच्या फेरीत त्याची गाठ चीनच्या लिन युशेन ह्याला ६-३ फरकानं हरवलं. दीपकनं सुरुवातीपासून घेतलेला आक्रमक पवित्रा शेवटपर्यंत सोडला नाही.

उपान्त्य लढतीत मात्र त्याला अमेरिकेच्या डेव्हिड मॉरिस टेलर ह्यानं हरवलं. त्याचा हा विजय तांत्रिक गुणांवर होता. आता दीपकला कांस्यपदकासाठी खेळावं लागेल. महिलांच्या फ्री स्टाईल ५७ किलो गटात अंशू मलिक हिला बेलारूसच्या इरिना कुरचकिना हिनं ८-२ असं सहज हरवलं. अंशूला केवळ दोनदा एक-एक गुण मिळविता आला.

भालाफेकीमध्ये नीरज चोप्रा ह्याने 'अ' गटात पहिले स्थान मिळवून अंतिम फेरी गाठली. एकाच प्रयत्नात त्याने ८६.६५ मीटरची फेक करून आपली जागा निश्चित केली. ह्या गटात दुसऱ्या क्रमांकावर असलेला जर्मनीचा जोहानस व्हेटर आणि नीरज ह्यांच्यात एक मीटरचं अंतर आहे. 'ब' गटातून पाकिस्तानच्या नदीम अर्शदने पहिला क्रमांक मिळवला आणि तोही पात्र ठरला. ह्या गटात शिवपालसिंग बारावा राहिला. गोल्फमध्ये अदिती अशोक हिनं भल्याभल्यांना चकित केलं.  पहिल्या फेरीनंतर ती संयुक्तरीत्या दुसऱ्या क्रमांकावर आहे. 

महिला हॉकीच्या चुरशीच्या उपान्त्य लढतीत अर्जेंटिनानं भारतावर २-१ विजय मिळविला. खेळाला सुरुवात झाल्यावर दुसऱ्याच मिनिटाला कर्णधार रानी रामपाल हिनं पहिला पेनल्टी कॉर्नर मिळवून दिला. गुरजितकौर हिनं संधी न दवडता चेंडू गोल जाळ्यात धाडून संघाला आघाडीवर नेलं. अर्जेंटिनाची फॉरवर्ड मारिया होसे ग्रॅनातो पाचव्या मिनिटाला डाव्या बगलेतून चेंडू घेऊन एकटीच आतपर्यंत पोहोचली होती. भारताच्या बचाव फळीतील खेळाडूंनी संभाव्य धोका टाळला. त्यानंतर आठव्या मिनिटाला अर्जेंटिनाला पहिला पेनल्टी कॉर्नर मिळाला. ऑगेस्टिना गोर्सेलानी हिनं फटकावलेला चेंडू पुन्हा आपल्या बचाव फळीनंच अडवला. खेळाच्या पहिल्या सत्रात आपल्या मुलींनी चांगली कामगिरी केली. पहिलं सत्र संपता संपता नवनीत कौर व ऑगेस्टिना ह्यांची धडक झाली. त्यात दोघींनाही दुखापत झाली.

जल्लोषाची एकच संधी.

दुसऱ्या सत्राच्या सुरुवातीपासून अर्जेंटिनानं आक्रमण चालू ठेवलं आणि त्याचं त्यांना लगेच फळही मिळालं. सतराव्या मिनिटाला मोचिया रोसिओ सँचेझ हिला पेनल्टी कॉर्नरची संधी साधणं जमलं नाही. पण त्यातून मिळालेल्या आणखी एका पेनल्टी कॉर्नरवर कर्णधार मारिया नोएल बारिओनुएव्हो हिनं बरोबरी साधणारा गोल केला. बरोबरीमुळं सावध झालेल्या भारतीय खेळाडूंना आक्रमणावर भर दिला. वंदना कटारिया हिने उजव्या बगलेतून चेंडू घेऊन मुसंडी मारली होती. पण वर्तुळाजवळ आल्यावर तिनं लालरेम सियामी हिच्याकडं पास दिला. तिला चेडूवर नियंत्रण ठेवता न आल्यानं एक मोठी संधी हुकली. त्यातून सव्विसाव्या मिनिटाला मिळालेला पेनल्टी कॉर्नर गुरजितने घेतला. गोलरक्षक मारिया बेलेने सुची हिला चकवणं तिला जमलं नाही. लगेचच मिळालेल्या पेनल्टी कॉर्नरवर आपल्याकडून फटकाच मारला गेला नाही. पुढच्या मिनिटाला अर्जेंटिनानं रचलेली चाल त्यांना पेनल्टी कॉर्नर देऊन गेली. ऑगेस्टिनाचा फटका बचाव फळीनं अडवला. मध्यंतराला खेळ थांबला तेव्हा बरोबरी होती.

उत्तरार्धाच्या पहिल्या सत्रात अर्जेंटिनानं आक्रमक पवित्रा कायम ठेवला. त्यातून त्यांना पस्तिसाव्या मिनिटाला लागोपाठ दोन पेनल्टी कॉर्नर मिळाले. ऑगेस्टिनाचा पहिला फटका बचाव फळीनं अडवला. त्यानंतर मात्र मारिया नोएलन गोलरक्षक सविता पुनिया हिला चकवून अर्जेंटिनाला आघाडीवर नेलं. अडचणीत भर म्हणून की काय एकोणचाळिसाव्या मिनिटाला पंचांनी ग्रीन कार्ड दाखवल्यामुळे नेहा गोयल हिला मैदानाबाहेर जावं लागलं. दुसऱ्या आणि तिसऱ्या सत्रात अर्जेंटिनाचा वरचष्मा दिसून आला. आक्रमण, पास देणं आणि चेंडूवरचा ताबा ह्या बाबतीत संघ वरचढ ठरला.

सामन्याच्या चौथ्या आणि निर्णायक सत्रात आपल्या मुलींनी जोरदार प्रयत्न सुरू केले. नवनीतकौरने पन्नासाव्या मिनिटाला रचलेली एक सुरेख चाल वाया गेली. पुढच्या मिनिटाला मिळालेला पेनल्टी कॉर्नर पुन्हा गुरजितनेच घेतला. पण गोलरक्षक सुची सावध होती. तिने मोठा सूर मारत चेंडू अडवला. त्यानंतरची नऊ मिनिटं आटोकाट प्रयत्न करूनही भारताला संधी साधता आली नाही. अखेरच्या क्षणी नवनीतकौर हिने मारलेला फटका गोलरक्षक सुची हिने पुन्हा एकदा जिवाच्या आकांताने अडवला आणि अर्जेंटिनाची अंतिम सामन्यातली जागा निश्चित केली.

ही लढत बऱ्यापैकी चुरशीची झाली, तरी आपण नेमबाजीत काहीसे कमी पडलो. चारपैकी एकाच पेनल्टी कॉर्नरवर आपल्याला गोल करता आला. अर्जेंटिनाला सहा पेनल्टी कॉर्नर मिळाले. चेंडू ताब्यात ठेवण्यातही अर्जेंटिनाचा संघ किंचित वरचढ ठरला. आता कांस्यपदकाच्या लढतीत भारतीय मुलींपुढे इंग्लंडचे आव्हान आहे. त्यांना आज द नेदरलँड्सने सहज हरवून अंतिम फेरी गाठली.

(सर्व छायाचित्रे आंतरजालावरून साभार.)

...

#Tokyo2020 #LovlinaBorgohain #RaviKumarDahiya #NeerajChopra #IndiainOlympics #DeepakPuniya #Athletics #Javelinthrow #boxing #wrestling